gan
Ohebydd Golwg360
Mae chwech o bobol wedi cael eu harestio yn dilyn cyfres o ladradau mewn capeli yng Nghaernarfon wythnos diwethaf.
Un o’r capeli oedd Capel Salem, gyda Chapel Caersalem hefyd yn cael ei dargedu gan y lladron.
“Yn dilyn nifer o ladradau mewn capeli lleol yn ddiweddar, cafodd chwe person eu harestio ar amheuaeth o ladrad, a bydd ein hymchwiliad yn parhau,” meddai llefarydd ar ran Heddlu Gogledd Cymru.
“oglau mwg a chwrw”
Roedd llanast mawr mewn rhannau o Gapel Salem megis y festri, ystafell y diaconiaid, y gegin, ac ystafell y bobol ifanc yng nghefn y festri a chafodd lloriau eu codi mewn rhai llefydd.
Ymysg yr eitemau gafodd eu dwyn mae system sain y capel, meicroffonau, ceblau, desg gymysgu, a hanner cit drymiau.
Dywedodd y Parchedig Mererid Mair wrth golwg360 fod “oglau mwg a chwrw” yn y festri.
“Mae’n gwneud i mi deimlo’n ddigalon bod unrhyw un wedi gallu gwneud y fath beth,” meddai.
“Roedd y lle yn iawn pan fuodd ein gofalwraig ni yno ddydd Iau diwethaf, ond pan aethon ni yno ddydd Mercher roedd rhywun wedi blocio ffenestri o’r tu fewn ac wedyn gweld y llanast ’ma.
Dywed y Parchedig Mererid Mair bod trysorydd y capel bellach wedi cysylltu gyda’u cwmni yswiriant er mwyn cael iawndal ond nad oes ganddynt syniad beth yw gwerth y difrod.
“Mae honno yn broses anodd, rydym ni’n gorfod disgwyl am adroddiad trosedd a phethau felly,” meddai.
Ond gyda’r capel eisoes wedi gorfod talu am ddiogelu’r drysau, am saer coed ac i geisio llogi offer newydd, mae’r digwyddiad eisoes wedi bod yn ergyd ariannol iddynt.
Gair o ddiolch
Mae’r Parchedig Mererid Mair wedi bod yn diweddaru pobol am sefyllfa’r capel ar wefannau cymdeithasol ac bod y capel yn ddiolchgar iawn am “waith caled” Heddlu Gogledd Cymru.
“Dio ddim yn mynd i fod yn hawdd, ond rydym yn ddiolchgar i’r heddlu, yr ofalwraig ac am y negeseuon clên ’da ni wedi eu derbyn,” meddai’r Parchedig Mererid Mair.
Diolch yn fawr i @HeddluGogCymru am eu help a'u gwaith caled ddoe ar ôl i ladron dorri fewn i Salem. https://t.co/rGyybGwPDg
— mererid m williams (@mereridmair) April 16, 2020
Diolch @HeddluGogCymru https://t.co/N5XJwT4VIg
— mererid m williams (@mereridmair) April 20, 2020