gan
Ohebydd Golwg360
Mae Sam Myrddin o Gaernarfon wedi sôn wrth Caernarfon360 am ei ryddhad yn sgil cynlluniau Llywodraeth Cymru i fyfyrwyr dreulio’r Nadolig a’u teuluoedd.
Ar ôl cychwyn digon dyrys i’w blwyddyn academaidd, cafodd y newyddion ei groesawu gan fyfyrwyr fel Sam Myrddin, sydd heb weld eu teuluoedd ers sawl mis bellach.
“Gadael digon o amser i bobl sy’n profi’n bositif”
“Mae’r penderfyniad yma yn ddigon teg,” meddai Sam Myrddin, sy’n astudio ym Mhrifysgol Caerdydd.
“Cyn belled â’u bod yn gadael digon o amser i bobl sy’n profi’n bositif i hunanynysu ac i wella i gael mynd adref”, meddai.
Bwriad Llywodraeth Cymru yw sicrhau bod cyswllt wyneb-yn-wyneb o fewn Prifysgolion yn dod i ben ddechrau fis Rhagfyr, fel bod modd i unrhyw un sydd â phrawf positif allu hunanynysu a gwella, cyn teithio adref am y Nadolig.
Yn astudio ym maes iechyd meddwl, dywedodd Sam Myrddin y byddai atal myfyrwyr rhag dychwelyd adref dros y Nadolig wedi bod yn niweidiol i’w hiechyd meddwl.
“Fyswn i ddim yn licio peidio gallu treulio’r Nadolig o adref o’ gwbl – dyna ydi ‘dolig,” meddai.
“Dwi isio gweld fy nheulu a fy ffrindiau.”
“… a dwi wrth fy modd hefo pubs Gaernarfon hefyd!”