gan
Hannah Hughes
Cyngor Gwynedd yn Cyhoeddi fod Cronfa Cefnogi Cymunedau Ar Agor ?
Agor y Gist – Cist Gwynedd 2022/23:
Grantiau cyfalaf a refeniw ar gael i grwpiau cymunedol a gwirfoddol Gwynedd
Mae grwpiau gwirfoddol a chymunedol Gwynedd yn cael eu hannog i ystyried gwneud cais am grantiau refeniw a chyfalaf i gefnogi amrywiol brosiectau fydd yn arwain at wella safon bywyd trigolion a chymunedau’r sir.
Mae Cronfa Cefnogi Cymunedau, Cist Gwynedd, yn cynnig grantiau o hyd at £10,000 i annog cymunedau i wireddu’r amcanion hyn drwy gymryd rôl fwy rhagweithiol yn eu cymunedau.
Yn ogystal, mae Cronfa’r Degwm yn cynnig grantiau rhwng £3,000 a £5,000 i elusennau cofrestredig. Mae canran o’r Gronfa yn cael ei ddosbarthu i eisteddfodau lleol yng Ngwynedd, sef swm o £300, a dylid ymgeisio drwy anfon e-bost ynghyd a chopi o ddatganiad banc diweddar i Swyddog Cist Gwynedd (CistGwynedd@gwynedd.llyw.cymru).
Mae pecynnau ymgeisio ar gyfer y cronfeydd yma ar gael ar wefan Cyngor Gwynedd:
Cronfa Cefnogi Cymunedau:www.gwynedd.llyw.cymru/cronfacefnogicymunedau
Cronfa’r Degwm:www.gwynedd.llyw.cymru/cronfardegwm
Meddai Sioned Williams, Pennaeth Adran Economi a Chymuned Cyngor Gwynedd:
“Mae grantiau Cist Gwynedd yn cefnogi amrywiaeth o brosiectau sy’n arwain at gryfhau cymunedau ledled y sir. Mae’n cynnig cyfle i drigolion wneud gwahaniaeth gwirioneddol yn eu cymunedau eu hunain.”
Y dyddiad cau ar gyfer ceisiadau Cronfa Cefnogi Cymunedau yw 13 Mai 2022. Mae’r ddwy gronfa ar agor, a derbynnir ceisiadau drwy e-bost yn unig. Mae ffurflen gais ar gael ar wefan y Cyngor, neu cysylltwch gyda’r swyddfa.
Am ragor o wybodaeth, cysylltwch gyda swyddfa Cist Gwynedd ar ebost: CistGwynedd@gwynedd.llyw.cymru neu ffonio 01286 679 153.