gan
Dewi Jones
Poster i’r digwyddiad
Mae hi’n agosáu at noson Tân Gwyllt unwaith eto yng Nghaernarfon – dydd Sul y 5ed ydi’r dyddiad i’r dyddiadur. Mi fydd y ffrwydrad gyntaf yn hedfan am 19:00 a’r lle perffaith i wylio’r arddangosfa, fel yr arfer wrth gwrs, ydi’r Prom.
Eleni, wedi ymgynghori gyda phobol Caernarfon, mae’r Cyngor Tref am arbrofi gyda Thân Gwyllt tawel am 5 munud gyntaf y sioe. Y bwriad yw, wedyn, cymharu hwn gyda’r arddangosfa arferol fydd yn dilyn.
Mi fydd y Llewod yno eto yn casglu pres i rannu ymysg grwpiau cymunedol yr ardal, ac mae’r Cyngor Tref yn ddiolchgar iawn iddynt am eu cymorth wrth drefnu’r noson.
Diolch i ymdrechion criw Gŵyl Fwyd Caernarfon bydd faniau bwyd ar y Prom yn gweini o 17:30 ymlaen, felly dewch yn fuan i fwynhau’r arlwy a’r awyrgylch.